முகப்பு உயிர்மை.காம் உயிர்மை பதிப்பகம் மாத இதழ் உயிரோசை வார தொகுப்பு தொடர்புகளுக்கு சந்தா எங்களைப்பற்றி
கட்டுரை
பித்தி மொஹந்தி – நம் காலத்தின் நாயகன்
ஆர்.அபிலாஷ்
சொலவடைகளும் பழமொழிகளும்
கழனியூரன்
தி கிரேட் எஸ்கேப்ப்ப்ப்ப்ப்ப்........!
கிராபியென் ப்ளாக்
‘கனவாரோ மீயோ’ (ஜோர்பா தி க்ரீக்)
சின்னப்பயல்
கவிதை
வீட்டில் எண்ணெயின்றி எரியும் விளக்கு; அம்மா!
வித்யாசாகர்
சுயம்பு
ஷம்மி முத்துவேல்
இளங்கோ கவிதைகள்
-
மகா இயக்கத்தின் சிறு நினைவு சிதறல்கள்
வளத்தூர் தி .ராஜேஷ்
சிறுகதை
இடைவெளி
ராம்ப்ர‌சாத்
பொது
இளங்கோ கவிதைகள்
-

எண்களற்ற கடிகாரச் சதுரம்..

 
உத்தரவாதங்களை மறுத்தபடி நகர்கிறது பொழுது 
சொற்களின் ஓரப் பிசிறுகள் தொடுவதற்கு ஏற்றதாக இல்லை 

ஜன்னல் சூரியனைத் தடுத்தபடி காற்றோடு பேசிக் கொண்டிருக்கிறது 
பூக்கள் நிறைந்த கொடிகளற்ற திரைச்சீலை 

எண்களற்ற கடிகாரச் சதுரத்துக்குள் எண்களின் நினைவுகளை 
அசைப் போட்டபடி துடிக்கிறது நொடி முள்

எழுதி வைத்துவிட்ட அர்த்தங்கள் திருப்தியற்று பெயர்களை 
யாசித்தபடி அடம்பிடிக்கின்றன தாமே மாறிவிடுவதாக 
அச்சுறுத்தும் தொனியில் 

நுணுக்கங்களை அணுகுவதற்கு அதனினும் நுண்ணிய 
காரணிகள் அவசியமாகிறது 

அக்காரணக் கருவிகளை செய்துப் பழக ஒத்துழைக்க மறுக்கும் 
எழுத்துக்கள் 
ஆய்த வட்டங்களுக்குள் ஒளிந்துக் கொண்டு பயன்படுத்தத் திணறும் 
சூத்திரங்களை பிரகடனப்படுத்துகிறது

உத்தரவாதங்களை மறுத்தபடி நகரும் சொற்களின் பொழுதுகள் 
தொடுவதற்கு ஏற்றதாக இல்லை 
**

பின்வாசல் பூட்டிய கதவுகள்


முன்பு 

பூச்சாண்டிகளின் உலகுக்குள் 
குழந்தைகள் நுழைவதில்லை 

அந்த 
ரகசிய உலகின் கதவுகள் 
திறக்கப்படாமலேயே 
அக்குழந்தைகள் வளர்ந்துவிட்டார்கள் 

இன்று 
பூச்சாண்டிகள் தத்தம் உலகிலிருந்து 
வெளி வருவதேயில்லை 

சுட்டி டிவி பார்த்தபடியே இரவு உணவு 
அனிமேஷன் வில்லன்களின் குகை 
யாவும் 
ரிமோட்டின் ஒற்றைப் பொத்தானில் 
திறந்துக் கொள்கிறது 

முன்னிரவு நேரத் தெருக்கள் 
வெறிச்சோடிக் கிடக்கின்றன 

வாசல்களற்று சத்தமின்றி கடந்துபோகும் 
பின்னிரவுப் பூச்சாண்டிகளை 
தெருநாய்கள் மட்டுமே 
ஊளையிட்டு வழியனுப்புகின்றன வேறெங்கோ 

******
மரம் உதிர்க்கும் காய்ந்த இலைகள்..

*
அத்தனை நிராசையுடன் தான் 
உன்னை நான் நெருங்குகிறேன் 

உனது சமரசங்களை ஒரு செய்தித்தாளைப் போல 
மடித்து வைத்திருந்தாய் 
தலைப்புக்கள் நிலம் நோக்கி 
தொங்கிக் கொண்டிருந்தன 

உன் - என் பார்வைத் தொட்டு நின்ற 
இடைவெளியில் 
மரம் உதிர்த்த காய்ந்த இலைகள் 
மிதந்தன நம் காற்றில் 

வா 
ஒரு டீ சாப்பிடுவோம் முதலில் 
அப்புறம் பேசிக் கொள்வோம் என்கிறேன் 

நீயுன் தலைப்புகளை அள்ளி 
உன் கைப்பைக்குள் திணித்துக் கொண்டு 
அமைதியாகப் பின்தொடர்கிறாய் 

*******

 

 

 

 

உங்கள் கருத்துக்களை படைப்புகளை அனுப்ப வேண்டிய முகவரி
uyirosai@uyirmmai.com அல்லது uyirosai.com@gmail.com