ஆதிச்சுதந்திரத்தின் அலைதல் வெறுத்து
குழந்தை கைத்தழுவலுக்கேங்கி
அடைபட்டுக்கிடக்கும்
காற்றடைத்த
விற்காத பலூன்களோடு
நடை சலிக்காமல்
சாலை வெயிலில் சுற்றித்திரியும்
வறண்ட கண் கொண்ட
பலூன் விற்பவனின்
கைவிரல் தேய்த்தலில்
‘ப்யூப்‘ ‘க்யூப்‘பென ஒலியெழுப்பிப்
போகுந்திசை நோக்கி
அப்பாவின் பேரன்பும்
பிரியத்தின் இதழ் மலரும்
அந்தித் தருணத்திற்காய்க் காத்திருக்கும்
காயத்ரியின் ஞாபகத்தில்
பதியனாய் அமர்ந்து கொள்கிறது
மறுமுறை பலூன்காரன் வருவதற்குள்
பலூன் வாங்கி விடுவதற்கான விருப்பம்.